Ceanglaítear le halt 8 den Acht um Shaoráil Faisnéise, 2014, ar chomhlachtaí saorála faisnéise scéim maidir le foilsiú faisnéise ag an gcomhlacht a ullmhú agus a fhoilsiú i gcomhréir leis an scéim foilsitheoireachta eiseamláireach agus leis na treoirlínte a rinne an tAire Caiteachais Phoiblí agus Athchóirithe i mí Dheireadh Fómhair 2014. Is é an toradh atá ar an gcur chuige sin go bhféadfar taifid a fhoilsiú nó a thabhairt lasmuigh den tsaoráil faisnéise ar choinníoll nach bhfuil aon toirmeasc dlí ann ar thaifid den sórt sin a fhoilsiú ná ar rochtain den sórt sin a thabhairt. Ina theannta sin, ceanglaítear ar gach comhlacht saorála faisnéise an oiread faisnéise agus is féidir a fhoilsiú ar bhealach oscailte inrochtana ar bhonn gnáthaimh lasmuigh den tsaoráil faisnéise, agus aird á tabhairt ar phrionsabail na hoscailteachta, na trédhearcachta agus na cuntasachta atá leagtha amach in alt 8(5) agus alt 11(3) den Acht um Shaoráil Faisnéise, 2014, agus ar an gCód Cleachtais a cuireadh le chéile de réir alt 48 den Acht sin.

An Scéim Foilsitheoireachta arna hUllmhú ag an Rialálaí Carthanas

D’ullmhaigh an Rialálaí Carthanas an Scéim Foilsitheoireachta Saorála Faisnéise uaidh de réir na Scéime Foilsitheoireachta Eiseamláirí agus na dtreoirlínte a rinne an tAire Caiteachais Phoiblí agus Athchóirithe. Ceanglaítear leis an Scéim sin ar an Rialálaí Carthanas faisnéis a chur ar fáil mar chuid dá ghnáthghníomhaíochtaí gnó. Maidir le doiciméid nach bhfuil díolmhaithe faoin Scéim, foilsítear iad ar aon dul lena bhfuil ar intinn leis an Treoir maidir le Faisnéis ón Earnáil Phoiblí a Athúsáid agus leis an oibleagáid atá ann faoin Treoir sin faisnéis a fhoilsiú agus a chinntiú go mbeidh an fhaisnéis sin inrochtana agus in-athúsáidte chun críocha tráchtála agus neamhthráchtála araon.

Le linn dó an scéim uaidh a ullmhú, bhí aird ag an Rialálaí Carthanas ar leas an phobail:

(a) le linn rochtain phoiblí ar fhaisnéis atá i seilbh an Rialálaí Carthanas a cheadú;

(b) le linn cúiseanna le breitheanna arna dtabhairt ag an Rialálaí Carthanas a fhoilsiú; agus

(c) le linn faisnéis is iomchuí nó is díol suime don phobal i gcoitinne i ndáil le gníomhaíochtaí agus feidhmeanna an Rialálaí Carthanas i gcoitinne a fhoilsiú.

Formáid Foilsithe

Rinneadh an Fhaisnéis sa Scéim a ghrúpáil ina sé aicme, mar atá liostaithe sa Scéim Foilsitheoireachta Eiseamláireach agus sna treoirlínte ón Aire Caiteachais Phoiblí agus Athchóirithe. Is iad seo a leanas na sé aicme sin: 

Mar aon leis an scéim a fhoilsiú ar shuíomh Gréasáin an Rialálaí Carthanas, foráiltear le halt 8(6) den Acht um Shaoráil Faisnéise gur cheart leagan clóite den bhunscéim a bheith ar fáil ag oifigí an Rialálaí Carthanas chun go bhféadfaidh duine den phobal amharc air le linn gnáthuaireanta oifige. I gcás go mbeidh duine den phobal ag iarraidh amharc ar an leagan clóite den bhunscéim, féadfaidh sé nó sí teagmháil a dhéanamh leis an Aonad um Shaoráil Faisnéise trí ríomhphost a sheoladh chuig FOI@Charitiesregulator.ie chun coinne a shocrú chuige sin.